Ég er ekki sá sem ég er...

Ég styð að fólk geti komið fram undir dulnefni, með skilyrðum þó. Ég skrifaði um þetta efni undir lok s.l. árs, en í og með voru hugsanir tengdu þessu viðfangsefni hvatinn að því að ég hóf að skrifa hér á blogginu. Hérna er það innlegg:Time og maður ársins, 2. vers.

Því miður hefur Mbl. brugðist trausti mínu og annar sem hér eru skráðir með óheppilegum TÆKNILEGUM mistökum sínum í dag.

Það er líka hreint ótrúlegt að lykilorð notenda skulu vera geymd í frummynd sinni (órugluð) - Mbl hefur ekkert með þessi lykilorð að gera á þessu formi - ALLS EKKERT. Eru lykilorðaveiðar stundaðar af rekstraraðilum Mbl? Er blogg.is Troju-hestur? Í raun ætti kennitala notenda að vera dulkóðuð líka. 

Mig langar að grípa niður í niðurlag greinar minnar:

Virkt eftirlit er gott mál - en því skyldi ekki ruglað saman við virka ritskoðun. Eftirlit snýst um að vernda þjónustuna (og notendur hennar) í samræmi við fyrirfram ákveðnar reglur og viðmið. Ritskoðun er geðþótta síun á umræðu, þar sem ákveðnum sjónarmiðum eða ákveðinni umræðu er ekki leyft að koma fram eða eiga sér stað. 

Hvernig á að vera hægt að treysta aðila sem stundar slíkt til þess að annast opna umræðu eða fyrir jafn viðkvæmum hlut og persónuleynd er? Það er af og frá að það sé hægt!

Ég sé aðeins eina leið fyrir aðstandendur kylfingur.is til þess að byggja upp traust. Þeir verða að semja og birta vinnureglur (Code of Conduct / Terms of Use / Privacy Policy) um hvernig þeir hyggjast standa að rekstri þessarar þjónustu.

Það er svo verulega athyglivert að Mbl er ekki með slíkar reglur fyrri bloggið - sjáanlegar.

Það er verulega brýnt að Mbl. taki hér til sín þau orð sem ég beini þarna til kylfingur.is. Mbl er skylt að taka á þessu máli af festu og það tafarlaust.

Ekki hægt að sanna hver skrifaði á spjallvef

Athugasemdir

[Ólafur Þórðarson, 22.2.2007 kl. 02:48]

Já sannarlega vekur þetta upp spurningar um hvernig visir.is haldi á sínum leyniorðum. Margir nota eitt orð fyrir allt, þ.m.t. bankakortin. Og góður punktur þetta með kennitöluna.

Þekkt er að klámvefsíður notfæri sér þetta þar sem ókeypis klám fæst bara fyrir að skrá sig með nafni og alles og líka hafa leyniorð. Svo eru krimmarnir sem notfæra sér þessar upplýsingar þeir sem annað hvort selja upplýsingarnar eða sjálfir nota til að komast inná bankareikninga viðkomandi.

En varðandi nafnleynd, þá er það allt annar handleggur og allt önnur umræða. Þeir aðilar sem undir skjóli nafnleyndar eru að drita á fólk úti í bæ eru lítill minnihluti þeirra sem skrifa undir nafnleynd. Flestir hafa bara lítinn áhuga á að menn viti hverjir þeir eru og geta legið margar ástæður að baki.

[Árni Matthíasson , 22.2.2007 kl. 11:58]

Ágæti Viggó.

Mér sýnist þú vera að rugla saman hugtökum hér, ritstýring er ekki sama og ritskoðun.

Segjum til dæmis svo að þú takir upp á því að gefa út blað og þér berist síðan efni sem þér þykir ekki birtingarhæft fyrir einhverjar sakir, til að mynda vegna þess að það brýtur í bága við almennt velsæmi, eða vegna þess að það fellur ekki að efnisskipan eða stefnu blaðsins. Ef þú tekur ákvörðun um að birta efnið ekki ert þú að beita sjáfsagðri ritstýringu, að taka ákvörðun um hvað birtist í þínu blaði. Ekki skiptir máli hvort blaðið er gefið út á Netinu eða á pappír.

Ef þú beitir þér til að koma í veg fyrir að viðkomandi efni birtist annars staðar, í öðrum fjölmiðlum eða á annarri vefsíðu til dæmis, ert þú aftur á móti að framkvæma það sem almennt er kallað ritskoðun og er bannað samkvæmt stjórnarskrá með ákveðnum undantekningum.

Hver sá sem heldur úti vefsíðu, hvort sem það er bloggsíða eins og þín eigin, hefðbundin heimasíða eða umfangsmikið vefsetur, hefur því, að mínu viti, rétt til að ákvarða hvað birtist á þeirri síðu og ekki hægt með neinum rökum að kalla það ritskoðun.

Netið hefur auðveldað mönnum að birta ýmiskonar efni en það hefur líka auðveldað mönnum að villa á sér heimildir. Sumum finnst það ekkert mál, en aðrir vilja helst aðeins fá athugasemdir eða ábendingar frá þeim sem skrifa sannanlega undir nafni. Nú veit ég til að mynda ekkert hvort myndin á þinni síðu sé af Viggó H. Viggóssyni eða hver Viggó H. Viggósson er yfirleitt. Ég gæti farið í þjóðskrá og fundið upplýsingar um Viggó H. Viggósson, hvar hann á heima og hvenær hann er fæddur, en það segir mér ekkert um það hver heldur úti síðunni og þó ég vissi fyrir víst að myndin sé sannanlega af Viggó H. Viggóssyni, er ég engu nær um það hver sé að skrifa. Reglur (Code of Conduct / Terms of Use / Privacy Policy) breyta engu um það.

Vangaveltur þínar um það hvort "lykilorðaveiðar" séu stundaðar af rekstaraðilum mbl.is eru sérkennilegar svo ekki sé meira sagt. Lykilorð hafa verið geymd ódulrituð í lokuðum gagnagrunni mbl.is til hagræðis fyrir notendur, bæði hvað varðar það að fá lykilorð sent í tölvupósti og einnig til að auðvelda aðra þjónustu. Fyrir hvert aðgangskerfi Mbl.is eru öryggisatriði metin sérstaklega eftir mikilvægi þeirra upplýsinga sem geymdar eru og við mátum að svo að hagræði notanda skipti miklu í þessu sambandi. Vel má vera að þessu verði breytt í framhaldi af klúðrinu í gær, en ekki hefur verið tekin ákvörðun um það.

Reglur um meðferð einkaupplýsinga á mbl.is finnur þú með því að velja Um mbl.is á forsíðu vefsins.

[Viggó H. Viggósson, 22.2.2007 kl. 12:52]

Sæll Árni,

Mikinn tel ég misskilning þinn, en hef ekki tíma til þess að "tækla þig" núna. Fer út að ganga með hundinn eftir kvöldmat. Ég geng oftast í nágreni við ykkur þarna upp í Hádegismóum, sæki þangað andlega endurnæringu - ætli ég nái ekki að stela útgeislun ykkar á Mbl. 

[Viggó H. Viggósson, 22.2.2007 kl. 19:45]

Byrjum á þessum orðum þínum:

"Vangaveltur þínar um það hvort "lykilorðaveiðar" séu stundaðar af rekstaraðilum mbl.is eru sérkennilegar svo ekki sé meira sagt. Lykilorð hafa verið geymd ódulrituð í lokuðum gagnagrunni mbl.is til hagræðis fyrir notendur, bæði hvað varðar það að fá lykilorð sent í tölvupósti og einnig til að auðvelda aðra þjónustu. Fyrir hvert aðgangskerfi Mbl.is eru öryggisatriði metin sérstaklega eftir mikilvægi þeirra upplýsinga sem geymdar eru og við mátum að svo að hagræði notanda skipti miklu í þessu sambandi. Vel má vera að þessu verði breytt í framhaldi af klúðrinu í gær, en ekki hefur verið tekin ákvörðun um það."

 

Hver hefur aðgang að "lokuðum" gagnagrunni mbl.is? Hversu mikil velta er á fólki hjá ykkur? Eða á ég ekkert að vera að velta því fyrir mér? Hvað er sérkennilegt við vangaveltur mína? Þú veist betur en þetta.

 

Sjálfum mér til hugar hægðar þá treysti ég ykkur og er alveg poll rólegur yfir málinu - þannig séð. Hitt er að ÉG Á EKKI AÐ TREYSTA YKKUR - þér getur fundist það verið sérkennilegt ef þú vilt. Þetta er einföld megin regla í umgengni með aðgangaheimildir á netinu að þú átt ekki að treysta neinum einum eða neinum. Mig grunar að þú myndir segja það sama öllum sem til þín kynnu að leita vegna spurninga um öryggi á netinu.

 

Hegða ég mér í samræmi við þetta, nei ég treysti ykkur .

 

Kjáninn ég.

 

Til hvers að standa í einhverju mati á mikilvægi - ég skil þetta ekki - dulkóðið bara allt heila klabbið og málið er dautt!

 

Þér að segja þá er lykilorðið mitt  alltaf mikilvægt alveg óháð mati ykkar á Mbl.is á mikilvægi þjónustunnar sem ég er að sækja hjá ykkur eða hjá öðrum. Mikilvægi þess hefur ekkert með með þjónustur Mbl.is að gera. Rannsóknir sína að þorri fólks er ákaflega fyrirséð þegar kemur að lykilorðum, ein "reglan" er m.a. sú að fólk leitast við að einfalda líf sitt og er stór liður í þeirri einföldun að nota sama lykilorðið fyrir allar eða sem flestar af þeim þjónustum sem það sækir. Notandanafn er svo enn fyrirséðara (nafn, blanda nafns, millinafns og eftirnafns, t-póstfang).  Þetta leiðir gerir einstaklingi sem er sæmilega velgefinn og álíka hneigður til glæpa mjög auðvelt að nota mbl.is til þess að stela aðgangs heimildum.

 

Varðandi það að hafa lykilorð ódulkóðuð þá hefur það bara lítið sem EKKERT að gera með HAGRÆÐI. Oftast er það nú þannig að þegar óskað er eftir lykilorði t.d. vegna þess að það hefur gleymst þá er lykilorðið endursett og notandanum sent nýtt í t-pósti, notandinn á síðan að breyta því strax.

 

Kemst ekki lengra að sinni,  Vetrarhátíð og Food and fun bíða.

 

Later.