Já það er mál að linni

Nú þarf þessu að linna; Ólafur Ólafsson og félagar verða að átta sig á því að þjóðin telur þann hóp manna sem hann tilheyrir og gjörðir þeirra vera undirliggjandi vanda. Þeirra vegna höfum við tapað eigum okkar og því sem meira er traustinu; trausti erlendra þjóða til okkar, trausti okkar á kerfinu, trausti til hvors annars og því er nú andskotanum verr og miður höfum við tapað sjálfu sjálfstraustinu.

Hvers vegna "við" fáum ekki að sjá skýrslu PWC er síðan, að því er virðist, hluti af öðru vandamáli; leynd og leynimakk er partur af íslenskri stjórnsýslu. Því verður líka að linna.

Ólafur neitar því að hann hafi haft hag af þessum gjörningi með Al Thani. Eigum við að trúa því? Látum sem svo að engin verðmæti hafi flakkað á milli hans og hinna, þá blasir við að leikurinn var til þess gerður að hreyfa við verðmætum; hafa jákvæð áhrif á gengi Kaupþings. Þar átti Ólafur manna mestu hagsmunni. Menn voru einfaldlega á fullu að falsa virði Kaupþings; samþykkt stjórnar Kaupþings um niðurfellingu á sjálfskuldaábyrgðum starfsmanna vegna kaupa á hlutafé í bankanum er af sama meiði og mál leiða líkur að því að ýmislegt fleira eigi eftir að koma upp úr dúrnum. Er ekki rétt að við áliktum að Ólafur og hans félagar vinni líkt og Al Thani fjölskyldan; velji verkefni af kostgæfni og beri fyrst og fremst eigin hag fyrir brjósti.

Hvers vegna "útrásarvíkingarnir", nú þeir Sigurður í Kaupþing (sem var) og Ólafur í Samskip (sem er) hafa ekki vit á því að þegja skil ég ekki; ekki trúa þeir því að mark sé á þeim tekið. Halda þeir að þeir geti haft áhrif á um ræðuna? Ég held að það sé vanmat á aðstæðum, stór misskilningur, ef þau áhrif eru einhver þá eru þau á verri veginn fyrir þá. 

Vel má vera að þegar öll kurl verða komin til grafar að hægt verði að hlusta á þessa menn, þangað til ættu þeir að eyða kröftunum í að ná vopnum sínu. En við hin, við megum ekki láta dreifa athygli okkar; við megum ekki þagna.

Áfram veginn... veg sannleikans og opnara þjóðfélags.

Ólafur segir engan hagnað hafa runnið til sín

Misvísandi skilaboð valdstjórnarinnar

Fólk er hvatt til nýsköpunar og þá sérstaklega þeirrar gerðar sem hefur jákvæð áhrif á gjaldeyrisbúskap þjóðarinnar. Þessi hvatning hefur náð til fólks og hafa sumir greinilega náð á skömmum tíma að koma upp framleiðslulínum sem eru farnar að gefa af sér gjaldeyrissparandi vörur.

Nei, nei er þá ekki löggan mætt á svæðið og rífur niður það góða starf sem hefur verið unnið. Nú er það bruggverksmiðja, fyrr í vikunni var tveimur kannabisverksmiðjum lokkað - hvað næst? Hátækni amfetamínverksmiðju kannski?

Valdstjórnin verður að tala skýrar - það er skýr krafa.

Áfram veginn...

Lokuðu bruggverksmiðju

Herrakvöld og konuvöld

Árstíðin sem senn fer í hönd, Þorrinn, er í mínum huga tíða karlmannlegust. Ég veit ekki af hverju mér finnst þetta; heiti fyrsta dags Þorra, bóndadagur, er hér hugsanlegur áhrifavaldur. En kannski er það vegna þess að mér finnst karlmannlegt, alltént umfram kvenlegt, að menn á Þorrablótum slafri í sig óþvera og drekki með brennivín og öl, segi sögur, kveði eða mikli sig með öðrum hætti.

Á Þorra hefur líka orðið til sá góði siður að stía kynjunum í sundur; smala saman vænum hópi karla á blót og eru samkomur af því tagi nefndar Herrakvöld, Greifakvöld eða viðlíka og konurnar eru þá með sín Konukvöld. Mest slíkra karllægra samkomna hefur til margra ára verið haldin í Árbænum, vitaskuld vísa ég hér til Herrakvölds Fylkis sem ávalt fer fram á fyrsta degi Þorra (föstudagur í þrettándu viku vetrar - 18-24 jan.). Herrakvöld Fylkis ber höfuð og herðar yfir sambærilegar samkomur annarstaðar á landinu - raunar svo að orðið "sambærilegar" er ákaflega óheppileg í þessu samhengi - skiptir þá ekki máli hvort menn telji heila eða hálfa hausa, hlátrasköll, hammarshögg eða önnur heljarstök skemmtileg.

Bóndadagur er þannig nánast heilagur fyrir okkur marga íbúa (og brottflutta) í Sigurhæðum. Ég hvet þá sem hafa áhuga á að kynna sér málið nánar að smella á myndina hér uppi (ef smellt er á myndina í þrígang ætti hún að vera orðin nægilega stór svo að miðaldra og eldri ættu að geta lesið textann).

Sjáumst hressir!

Hér eru tvö myndbönd sem mér finnst tengjast þessu með einhverjum hætti:

 

 

Árið 2009 er vonæri, kreppan verður skreppa!

Núllníu verður ekkert hallæri hjá okkur Íslendingum, en heldur ekkert góðæri; skreppan (= stutt kreppa) verður búinn í haust eða byrjun vetrar.

Við erum nálægt botninum og réttast fer úr þessu hjá okkur á næstu mánuðum. Það gerist svona um svipað leiti og aðrar þjóðir átta sig á því að þær eru í síðum saur: Oopps ... allt hrunið, hvernig, hvað, hvað gerðum við, eða gerðum ekki?

Vonærisspá mín getur því aðeins orðið að veruleika ef menn: stjórnvöld, sjóðir, peningafólk og athafnafólk eykur afköst sín til góðra verka. Fyrrnefndir hópar hafa það í hendi sér að gera akurinn kláran, almenningur, við munum yrk'ann.

Eins og ég hef nokkrum sinnum bent á áður (m.a. hér fyrir 3 mánuðum: Endurreisn) þá er auðvelt að endurreisa efnahag þjóðarinnar: aðeins þarf að taka nokkrar ákvarðanir, stilla saman slatta af strengjum, svo er bara að gera'ða, gera'ða, gera'ða.

Það er betra að eyða einhverjum 100 milljörðum núna, gera það hratt en fumlaust því fyrr og hraðar sem hjólin snúsast því fyrr fáum við þessa aura til baka. 

Nokkrir aðgerðapunktar:
Keyra upp atvinnustig
- Endurreisnarsjóður
-- örlán til smærri og meðalstórra fyrirtækja
-- lán til sprota- og nýsköpunarfyrirtækja
-- styrkir til sprota- og nýsköpunarfyrirtækja
-- fjármagna þriðju stoðina as per SI
- Mannafls frekar framkvæmdir á vegum ríkisins
- Stóriðja
- Innflutningur ferðamanna ("frítt" flug fyrir 500 - 1000 manns á dag)
Bjarga heimilunum
- Atvinnustigið sbr. hér að ofan
- Verðtryggingin burt
- Breyting lán einstaklinga í erlendri mynt í lán í íslenskum krónum (gvt=gvt þegar lán var tekið, hugsanlega með botni)
- Finna leið til þess að bæta þeim einstaklingum sem töpuðu ævisparnaði sínum að hluta eða öllu leiti (t.d. þeir sem áttu hlutabréf í bönkunum)
Almennar aðgerðir
- Gerum krónuna að stöðugum gjaldmiðli, nýtum reynsluna, nú vitum við hvað þarf til
- Stoppa uppí götin á hripleku ESB regluverkinu
- Nokkrir stjórar í burt
- Fara í hart við UK vegna IceSave og beitingu hryðjuverka laga
- Gerum áætlun um hvernig megi minnka umsvif Ríkisins til framtíðar
- Frysta þá milljarða sem "auðmennirnir" voru búnir að koma undan

Áfram veginn ... til Lýðveldisins Íslands 2.0

Svíar vilja lána Íslandi

Creditinfo péerrar á fullu og RÚV bíður nýja þjónustu...

Neyðin kennir naktri konu að spinna ... Að því er mér virðist bíður RÚV uppá nýja þjónustu, hér er um að ræða það sem kallað er uppá ensku infomercial  eða auglýsingar í formi hefðbundins sjónvarpsefnis (sjá http://en.wikipedia.org/wiki/Infomercial).

Fyrsti partur Kastljóssins í gærkvöldi var mér algjörlega óskiljanlegur - meiriháttar píp. Þóra Arnardóttir spjallaði við Hákon Stefánsson, stjórnarformann Creditinfo um ... tja vöru sem fyrirtæki hans bíður en augljós (eini) kaupandinn vill augljóslega ekki kaupa. Ó og þá er farið í Kastljósið og búin til "frétt" ekki nóg með það Þóra krefur kaupanda svara, spyr: Afhverju viljið þið ekki kaupa? Og fær svar. Snilld!

Eða ekki.

Þá held ég að engar fréttir hafi verið betri fréttir.

Ég finn ekkert yfir infomercial þjónustu í verðskrá RÚV ohf. og ég athugaði ekki hvað það kostaði hjá Creditinfo að fá eitt stykki krosseignartengslamynd þar sem t.d. Baugur væri miðjan - enda gæti ég ekki keypt hana, né þegið þó hún væri í boði hússins.

Hvað er að: hjá Kastljósinu að detta á þetta plan ekki frétta, að ganga fram með þessum hætti í sölumennsku fyrirtækis út í bæ og hjá Creditinfo að láta sér detta í hug að fara þessa leið til þess að tala við eina mögulega viðskiptavin sinn á tiltekinni þjónustu.

Reyndar hafa þau hjá CI verið mjög dugleg við að koma sér í fréttir uppá síðkastið: 3.500 fyrirtæki að rúlla, skúbbið í Kastljósinu í gær og engin vill tryggja Ísland í dag.

Er kannski eitthvað að?

Áfram veginn ... veg upplýsingar.

Neita að tryggja Ísland

Borgarafundur nr. 8 og tilgangsleysið

Ég var að horfa á útsendingu RÚV á Borgarafundurinn frá því á mánudaginn; hreint kostulegur fundur og í flottum takti við það sem ég hef séð af þessum samkomum hingað til. Kristallast í málflutningi manna eins og Einars Más; ómálefnalegir jafnvel þegar allar aðstæður hafa verið til þess að gera góða hluti - virkilega leiðinlegt.

Sorglegt fyrir almenning eins og mig.
Sorglegt og dónalegt fyrir þá sem þarna voru til þess að þjóna fundinum, málstaðnum.

En aðeins um fundinn, þann áttunda:

Fyrst var það Raffaella, klassíkur talnabrjótur; vel hugsandi og skipulögð en dapur ræðumaður. Það hefði verið ótvíræður kostur að sjá myndirnar sem hún sýni til þess að ná betur innihaldi ræðu hennar.

Svo var það karlinn hann Robert "Veit" Wade sá sem átti að hafa vitað þá og vita nú. Sannspái hagfræðingurinn, sem ekki var hlustað á þó ekki væri hann í eigin föðurlandi. Vafalaust veit Veit heilan helling, en bara ekki mikið um það sem hann vara að fjalla um þarna á þeim áttund. Hann sá reyndar sérstaka ástæðu til þess að taka það fram í spurt og svarað kaflanum þegar hann vildi ekki svara spurningu sem að honum ver beint vegna þess að hann vildi ekki tala um hluti sem hann hefði ekki þekkingu á. Hann hefði kannski ekki átt að skoða þennan punkt áður en hann sté í pontu. Reyndar var þessi spurning þess eðlis að ekki var þess krafist að Veit vissi eitthvað um einhverjar sértækar aðstæður, heldur að ætlast til þess að hann hefði almenna leikni til að geta í ákveðna stöðu - færni í því að hugsa eins og hagfræðingur en ekki sagnfræðingur. Þetta sá Talnabrjóturinn og kom með svar sem meikaði sens.

En hvað um það mér fannst að efnislega væri fyrirlestur Veits "meira af því sama"; þar kom ekkert nýtt fram, en til þess að fanga athygli hjarðarinnar beitti hann brögðum úr fyrsta kafla Almennrar handbókar í lýðskrumi; höfða til hjarðarinnar sjálfrar: þið eruð ferlega flott, flink og fín. Nú eða með því að segja eitthvað niðrandi um meinta óvini (menn, stofnanir, flokka) hjarðarinnar. Klikkar aldrei.

Hjörðin klappaði þá helst þegar eitthvað var sagt sem hafði enga þýðingu fyrir þann vanda sem við stöndum frami fyrir. Þetta var reyndar svo öfugsnúið að gleðin var mest þegar Veit sagði eitthvað um hvað við hefðum getað gert betur en gerðum ekki og þess vegna værum við í svona hrikalega síðum saur - þá var klappað, staðið upp og stappað.
 
Frygðarbylgjan reis þó hæst þegar sá "vitri" tók bókstaflega við að níða fjarstaddan mann, sem  auðvita var Davíð Oddsson - frumlegt sem það nú er. Ódýrt sem það er.

Þegar Veit fjallaði um hugsanlega upptöku krónunnar, þeirrar Norsku, virtist mér gæta þversagnar í máli hans. Eftir á að hyggja þá held ég að þversagna hafi gætt víða. Kannski að ég lesi ræðuna hans yfir, enda er Robert Wade fræðimaður sem eitthvað veit og eitthvað kann. Sem bragð er af.

Næst talaði Sigurbjörg Sigurgeirsdóttir, konan sem misnotaði traust þegar hún í upphafi máls síns fór með dylgjur; sagði frá beinum hótunum í sinn garð og það frá ráðherra.

Ef við flettum upp í handbókinni sem við vitum (grunar) að Veit styðjist við - Almennrar handbókar í lýðskrumi - þá er fjallað um dylgju aðferðina í kaflanum um ódýru en áhrifaríku brögðin: Fá brögð eru betri til að ná athygli hjarðarinnar, skelltu fram safaríkri fullyrðingu sem engin getur vitað nokkuð um nema þú, t.d. fullyrðingu um að valdið hafi sýnt sig, að tilraun hefði verið gerð til að þvinga þig til hlýðni, en það muni ekki takast. Aldrei.

Mistök SS voru að hún sveiflaði vopni sínu í of þröngum hring og hjó svo of nærri vini í þokkabót. En fram hefur komið að þarna voru tvær konur, vinkonur, að misnota traust hvorar annarrar; Ingibjörg Sólrún hafði ekkert með það að gera að skipta sér af vinkonu sinni og vinkonan átti auðvita ekkert að segja frá þessum klaufaskap ISG. Svona gera kvenmenn ekki!  Reyndar sýnist mér að ISG hafi vitað í hvað stefndi og viljað forða vinkonu sinni frá vá. En SS átti nóg til af dylgjum af þessu tagi og sletti skyrinu. Guðlaugur Þór fékk væna slettu. 

Eftirá vekur það sérstaka athygli hvernig fjölmiðlar bregðast við. Guðlaugur Þór hefði nú heldur betur fengið á baukinn ef hann hefði átt í hlut; eins og augljóst var að margir óskuðu sér innilega. Ég sé fyrir mér vonsvikin andlit á mörgum fréttamanninum; hefðu viljað grilla gaurinn.

Næstur tók til máls Herbert Sveinbjörnsson: Hebbi, Hebbi, Hebbi, æi, hvað get ég sagt. Jú kannski þetta: Herbert mundu að ég er líka almenningur!

Finnur Odds sýndi svo dug (eins og aðrir fulltrúar Verzlunarráðsins) að láta sjá sig, ég var reyndar hissa eiginlega vonsvikin á upphafsorðum hans, sem voru eitthvað á þessa leið: "Ég er sammála flestu sem hér hefur komið fram ...". Ég trúi þessu ekki fyllilega, sammála sumu jú en ekki flestu og fannst mér Finnur staðfesta það í máli sínu.

S&S kaflinn var svo tja... fyndinn. Þeir sem reyndu að vera málefnalegir áttu varla séns.

Áfram veginn ... til borgaralegrar endurreisnar.

Jón Þór: Áhugaverður fundur með Wade

Jólakveðjur

 Smellið tvisvar (til þrisvar) á myndina til þess að stækka hana.

 

Ný útrás!

Nýtt upphaf? Kannski að nýjum harmleik?

Vonandi ekki.

Áfram veginn ... útrásarveginn.

TM opnar útibú í Færeyjum

Dýrtíðin, golfið og ég

Textanum hér að neðan klambraði ég saman eftir að hafa lesið athugasemd á net spjalli kylfinga, athugasemdin fjallaði um að sá golfbloti sem ég leik aðallega með og vill alltaf leika með kostar nú um 1.000 krónur íslenskar.

 ---oo0oo--- 

Ég var eitthvað að stússast í tiltekt um helgina, stússið var eins og oftast áður í hálfgerðu fússi - tiltektarstúss í fússi er einfaldlega minn stíll. Enda eitthvað það allra leiðinlegast sem ég kemst í. Hvað um það, best að koma sér að efninu (koma boltanum í leik).

Í tiltektinni var ég að raða ýmsu dóti (drasli) inni bílskúr. Ég strauk m.a. veiðigræjunum, góðar minningar hrísluðust um mig, það var sem ég heyrði sönginn í flugulínunni þegar átjánpundarinn velti sér á kollý doginn minn og rauk niður breiðuna. Hvergi er betra að vera en á Íslandi á fögrum sumardegi. Þetta var reyndar snemma um morgun, þarna sem ég setti í þennan stóra, þetta var í .... hum, látum þessa sögu bíða í bili. En ókey, þegar koma að því að laga til í golfgírnum báru tilfinningarnar mig næstum ofurliði. Ég spýti á feisið á drævernum og strauk yfir það - þessi snerting varð til þess að allar minningagáttirnar opnuðust samtímis. Fljótlega varð þó ein minning öðrum sterkari: minning frá fyrsta teig í Holtinu. Ég búinn að slá, flottur bolti klýfur loftið, hækkar sig fyrstu 210 metrana og sveigir lítið eitt til vinstri, nett dro, hann lækkar hratt flugið og kemur niður við brekkuna vinstramegin við flötina kastast einu sinni upp og rúllar síðan niður brekkuna inná flötina í áttina að holunni. Áfram, gó bol gó! Boltinn strýkst við stöngina, hoppar upp af holubarminum fjær og stöðvast tvö fet framyfir holuna. Damn hann var aðeins of fastur - hefði átt að tía upp metir aftar. Atburðurinn minnir mig á að ég þarf að æfa lengdarstjórnun fyrir næsta sumar.

Ísland er best og langbest á fögrum sumardegi og allra best á golfvellinum.

Aftur inná braut - hanga á leikskipulaginu. Sumsé í þessari tiltekt fann ég nokkra tugi golfbolta og bætti þeim í poka og töskur sem fyrir voru næstum fullar - nokkur hundruð golfboltar í það heila. Í hillunni þar fyrir ofan eru nokkur dúsín af nýjum boltum, þarna kennir ýmissa grasa en mest er um ýmsar gerðir af Tætlest - þar á meðal eitt og hálft dúsín af Pró V1 og V1*. Samskonar bolta og ég var með í högginu sem ég lýsti áðan.

Talandi um þá sögu þá get ég bætt við að eftir að ég hafði smurt próvaffinum í holu fyrir léttum erni - þarna á fyrstu - það var eilítið hægri vinstra brot í línunni sem ég hafði ekki miklar áhyggjur af, enda var ég með í huga ítroðslu beint í'ana miðja. Flott byrjun. Ég skundaði sem leið lá uppá annan teig - var að spila af hvítum - reif upp sjöuna og bússnelinn. Um leið og flaggið var komið í holu skaut ég með bússaranum á lengdina, svarið var 157. Skaut aftur og fékk lengdina staðfesta deffínettlý 157 metrar. Lagði kíkinn niður við hægra teigmerkið. Af gömlum vanan skóf ég með þellinum úr grófunum á blaðinu - þetta var óþarfi, enda kylfan hreinni en allt sem hreint er. Ég setti þöllinn á milli vísifingurs og löngutangar og boltann í lófann þannig að þegar ég þrýsti hendinni á móti sverðinum á teignum þá ýtti boltinn þellinum niður. Ég létt boltann rétt standa upp af sverðinum, rétt úr mér og um leið og ég setti á mig hanska gekk ég aftur fyrir boltann. Nú sá ég fyrir mér höggstefnuna. Fann fyrir hægri hafgolunni, sem strauk mér létt um vinstri vangann, eiginlega beint á hlið, en þó aðeins með. Pinninn: uppi hægramegin, töff staðsetning. Mitt mat: vonlaust að vera of langur eða hægramegin fyrir utan - málum þessi svæði rauð, bannsvæði - þá betra að vera of stuttur í glompunni. Mín áætlun: tía upp hægramegin, miða á miðja flötina, slá svo með fallegu feiti, lenda uppá pallinum sirka pinn-hæ, stutt hopp fram og fá svo kannski metir til baka í snörpu spóli. Mín framkvæmd: tók aðeins niður á gripinu, skveraði mig af, full sveifla, gott tempó. Ég fann að þetta var að gera sig....

Það þarf náttúrlega ekkert að spyrja hvernig eftirfylgnin með þessari visjón var, ég meinaða, það söng í stönginni þegar próvaffinn spólaði sig til baka, klank, ég stóð á öndinni - var 'ann í? Öskur og læti af þriðja teig. Nær: félagarnir hoppandi og skoppandi við hliðina á mér. Ég: reif upp bússnelinn og ... og ... fjandans, þarna var hann ... ég sá hvar boltinn lá á brúninni, hálfur á bak við stöngina. Við erum að tala um fokking millímetra, andskotans ör... eitthvað helvíti lítið.

Ókey, ókey aftur inní í ískalt íslenskt svartnættið og í skúrinn heima, aftur að tiltektinni og vonda skapinu. Fússinu. Jamm, þar sem ég stóð og horfði (eftir að hafa þurrkað tárin, sem fagrar minningar höfðu framkallað, úr augunum) á þennan glæsilega sjóð af próvaff boltum, sem þrátt fyrir að hafa verið keyptir í okurbúllunni á Miðnesheiði eru einhver bestu kaup sem ég hef gert. Ég hugsaði með mér að sennilega myndi það þykja rosalega eitthvað tvöþúsundogsex að spila með þeim næsta sumar. Leit niður á gólfið, á pokana og töskurnar og hugsaði: það hlýtur að vera hægt að finna slatta af vel nothæfum boltum þarna, ég meina Toppflæt-menn hafa verið að gera góða hluti undanfarið, minnir mig að einhver hafi sagt einhverstaðar og sama má segja um marga aðra framleiðendur. Allt saman fínir knettir barasta, próvaff er þegar betur er að gáð ekkert möst. Ofmetnir skal ég segja ykkur.

Eftir að hafa beðið í dágóða stund þarna á annarri og þurft að horfa uppá félagana bauka og brölta við bógeyin fékk ég auðvita bördý, hæfæv við félagana og áfram haldið, prílað uppá þriðja teig. Höggsýn mín var skýr, smúðth dro, lending í vinstrikanti brautarinnar. Lengd: tæpir 290 metrar. Pinninn hægra megin á flötinni ...

Fyrir þá fjölmörgu sem vilja rifja upp þennan hring með mér bendi ég á síðuna www.dream-on.com/mybestround þarna er farið í gegnum hringinn högg fyrir högg, bæði af mér auk þess sem margir helstu golfkomentteitorar og spjallspekingar rökræða leikskipulagið og nánast hnökralausa framkvæmd þess.

Kv
V.

ES: Til sölu eru nýir golfboltar, um er að ræða 12 stk. af Pro V1 og 6 stk. Pro V1* í óriginal umbúðum og allt. Verð: tilboð. Lægsta boð: 950kr. (svart)
ES.ES: Það er rétt hjá Snike, næsta sending verður svo mikið mikið dýrari.

Dodge the ball

Eitt má Goggi Bús eiga, hann er sjóaður stjórnmálamaður. Það vitum við Íslendingar hvað þýðir; þeir láta ekki hitt sig svo auðveldlega, eru duglegir við að forðast vandan, eru hálir sem álar.

Því miður eru það einmitt þeir, þessir sjóuðu, sem skipta máli; geta komið okkur í vandræði. Koma okkur í vandræði. 

Áfram veginn... þótt háll sé!

Bush varð fyrir skóárás

Sjálfhverfa embættismannakerfisins

Ótrúleg niðurstaða kjararáðs eða hvað? Ég er ekki í vafa að rökstuðningur ráðsins verður orðum hlaðinn, það mun ekki vanta tilvísanir í lög, reglur og fordæmi - líklega verður stjórnarskráin dregin að borðinu líka.

En fyrir okkur sem stöndum utan við sjálfhverft embættismannakerfið verður þessi rökstuðningur þeim mun merkingalausari sem orðin verða fleiri. Niðurstaðan er einfaldlega í hrópandi ósamræmi við allt og allt.

Hitt er svo að ég gleðst yfir því að ríkistjórnin ætli sér samt að klára þetta mál. Að vísa pirrar það mig nett talið um að "leita lausna" - það þarf ekkert að leita lausna þær liggja áreiðanlega þegar fyrir.

Áfram veginn... þennan breiða og greiða.

Kjararáð getur ekki lækkað launin

Öskrandi kauptækifæri...

... það er ekki á hverjum degi sem fólk dettur um svona tækifæri.

Ó, en ég vil minna fólk á, svona áður en rokið er útí næstu Nasdqbúð til að kaupa böns af díkódi, að kaup í hlutabréfum eru áhættusöm, ákaflega áhættusömu. Já og annað, að kaupa í díkód er ekkert short term stöff, við erum að tala um að vera long í þessu.

Áfram veginn... til umskipta (þótt því fylgi áhætta)

Gengi bréfa deCODE aldrei lægra

Heppnir Danir

Alltaf sama sagan með Baunana, drullu heppnir alveg hreint. Hafa ekkert, eiga ekkert, tja nema kannski mannauð; gengur einhvernvegin allt í haginn samt. Oftast.

Eða svo er að sjá.

Það að Anders Fogh Rasmussen sé að leita að svona "the end" jobbi í útlöndum en ekki heima fyrir er dæmigert fyrir þessa heppni þeirra. Hugsið ykkur bara ef okkar "afdönkuðu" stjórnmálamenn hefðu nú haft vit á því sama, ha! Væru kannski bara að vina í Brussel eða eitthvað! Ja hvar værum við þá?

Kannski að þessi mannauður sé einmitt málið.

Áfram veginn... mannauðugan.

Telja Fogh í atvinnuleit

Fjallkonan Medúsa

Ég var að hlusta á forseta vorn í Kastljósinu og þá varð til mynd í höfðinu á mér. Ég sá fyrir mér Medúsu (t.d. í mynd Rubens hér að neðan) komna með höfuðlag fjallkonunnar (Eldgamla Ísafold þ.e. gamalt landakort af Íslandi morphað yfir andlit hennar).

Skriðkvikindin, eiturnöðrurnar, voru með andlitsmyndir þátttakenda í aðdraganda og eftirleik Íslenska efnahagshrunsins. Þarna voru dabbi kongur (sem var), óli grís (sem er), jón (sem kannski verður) násker, hannes (sem er hinn) smái, bankastjórar þeirra gömlu "góðu" banka, bjarni hlaupagikkur, geir (ekki svo) harði, solla bolla, bjöggarnir, já þetta fólk og þeim líkt væri þarna í forgrunni. Í bakgrunni væri restin af ríkistjórninni og þeirri síðustu - gæti séð fyrir mér að þorgerður og björgvin teygðu álkuna á sér eitthvað yfir restina af liðinu.

Beitar tennurnar Medúsu sem voru, en eru nú niður botnar, eyddar - allt bit farið; þær gætu staðið fyrir íslensku fjölmiðlana. Bitlausa sem þeir hafa reynst, máttlausa, tuskulega.

Mér dettur í hug að ormarnir sem eru á flótta út úr myndinni tákni minni spámenn í útrásinni og fjármálaeftirlitið og restina af seðlabankastjórninni - já og allt liðið sem er að reyna að komast hjá því að verða bendlað við málið, s.s: VR stjórann, bankastýruna áhættumeðvituðu og svaðheppnu, já já ekki má gleyma greiningardeildastjórunum og heilum helling af handónýtum hagfræðingum, sem svo vel hafa greint fyrir okkur ástandið (ég vil nota þetta einstaka tækifæri til þessa að þakka góð ráð).

Gaman væri að einhver kynni að teikna þessa mynd. En eitt er víst að hver sem liti óskapnaðinn, skrímslið, augum mun steinrunninn verða. Hugsanlega er það svona sem útlendingar sjá land okkar og þjóðina um þessar mundir og vita ekki hvernig á að nálgast okkur.

Sem vonlegt er, sem vitlegt er.

Áfram veginn... veg umskipta!

Eldgamla Ísafold
Eldgamla Ísafold,
ástkæra fósturmold,
fjallkonan fríð.
Mögum þín muntu kær,
meðan lönd girðir sær
og gumar girnast mær,
gljáir sól á hlíð.
höf:Bjarni Thorarensen

Mikið fjallað um ummæli forsetans

Erfið staða en svo langt því frá að vera vonlaus

Nick Vujicic heitir ungur maður sem veit sitthvað um að vera í alvarlegri stöðu, þekkir það frá fyrstu, tja hendi, að falla flatt fésið á - aftur og aftur. Hann hefur lært að horfast í augu við vanda sinn, taka á honum - hefur lært að horfa björtum augum til framtíðar.

Ég fékk þetta frá vini mínum í tpósti áðan, hann taldi þetta skylduáhorf; því er ég sammála.

Mera um Nick: www.lifewithoutlimbs.org og en.wikipedia.org/wiki/Nick_Vujicic

Staðan er grafalvarleg

Runnið á lyktina

Ég og hundurinn voru ekki komnir útum dyrnar hérna efst í Sigurhæðum þegar við urðum lyktarinnar varir, hnusuðum út í loftið í takt; eitthvað var að brenna hugsaði ég - veit ekki hvað Zorró hugsaði.

Þegar við vorum komnir út á Selásbrautina, sem ekki eru nema 40m, lá staðarákvörðun fyrir; þetta hlýtur að koma ofan úr Hádegismóum, frá Mogganum hugsaði ég - veit ekki hvað Zorró hugsaði.

Við hlupum áfram léttir á fæti, með trýnið upp í loftið; mót lyktinni. Ég velti því fyrir mér hvort að staðan hefði verið svo kolbikar svört þarna hjá þeim á Mogganum að þeir hefðu barasta kveikt í Óðalinu - held að Zorró hafi ekkert verið að pæla í því.

Þegar við skeiðuðum framfyrir húsin við Næfurásinn sá ég hvers kyns var, eitt af "sumarhúsunum" í hlíðinni norðan við Rauðavatnið var greinilega brenna - það efsta við slóðann sem liggur í áttina að Paradísardal. Ég áttaði mig á því að ég var ekki með síma og gat því ekki gert viðvart si svona, en taldi þó líklegt að það hefði þegar verið gert - enda lagði mökkinn yfir byggðina, m.a. Moggaskrifstofuna.

Reyndar sé ég það á mbl.is að tilkynning barst kl. 15:59 og skv. því hefði ég kláralega verið mínútu eða tveimur fyrr á ferðinni með mína tilkynningu.

Við runnum á lyktina, á köflum var erfitt að hlaupa í kófinu - veit að nú hugsaði Zorró það sama og ég - fjárans fnykur.

Við vorum nánast komnir að eldinum þegar "brunabílinn" urraði fram úr okkur, upp brekkuna, við tókum á okkur góðan krók og svifum upp á litla hæð þar sem bústaðurinn stendur undir. Við komum að húsinu, hlémegin, á þeim stað sem myndin með fréttinni er tekin.

Þetta er það hús þarna uppfrá sem einna verst er til haldið, svo illa að ekki var að sjá að slökkvikarlarnir (brunakarlarnir) teldu mikla pressu á sér að ná tökum á eldinum strax. 

Ég held að þessi mínúta, eða voru þær tvær, hefði engu breytt um örlög sumarhallarinnar.

Sem er gott til að vita.

Áfram veginn... þó vaða þurfi reyk. 

ES. Svo finnst mér það arfaslök fréttamennska að kalla húsið skúr og ekki skil ég að menn vilji hafa þetta í fleirtölu - enda ekki svo mikið sem neisti í útihúsum.  Okey þetta var kannski ekki höll.

Eldur í skúrum við Rauðavatn

Þetta er ekki, ekki þolandi!

Það er hægt að mótmæla á ýmsan hátt, m.a. með sýnilegum hætti eins og nú stendur til. Ég hef þegar mótmælt þessu sjá hér: Sjálfsvörn

Önnur leið til þess að mótmæla er áþreifanleg; fólk getur sagt sig tímabundið úr VR eða þar til stjórn og formaður hafa brugðist rétt við.

Í mínum huga snúa þessi mótmæli ekki að persónu Gunnars, þó svo að ég sjái honum ekki annað fært en að taka pokann sinn, þau óbeint að stjórnarmönnum í VR, þau eiga í sjálfu sér ekki aðeins að lúta að þessari mjög svo misvitru ákvörðun um að fella niður persónulegar ábyrgðir bankamanna. Mótmælin eiga fyrst og fremst að beinast að því hvernig lífeyrissjóðir landsins starfa; krafan á að vera að starfsháttum þeirra verði breytt.

En fyrir alla muni mótmælum með von um virðingu og réttlæti.

Áfram veginn... til umskipta.

Vilja stjórn VR burt

Obama syngur og dansar

Ég sá auglýsingu frá  Já 118 rétt áðan, við það rifjaðist upp þetta Obama Bollywood stæl!

Obama ræðir við fjölmiðla

Sjálfsvörn

Nú get ég ekki meir. Nú er ég reiður. Reiði er gjöf, ég hef rétt til þess að vera reiður, rétt til þess að krefjast umskipta.

Þennan tölvupóst hér að neðan sendi ég á stjórn VR áðan. Ákvað að láta fyrstu viðbrögð ráða. Skjóta viðstöðulaust. Ég skaut frá mjöðminni, vildi að ég hitti óværu framtíðar.

Ég skaut í sjálfsvörn.

Áfram veginn... nýja veginn!

	Viggo Viggosson
to		[e-mail],[e-mail], [e-mail], [e-mail], [e-mail], [e-mail], [e-mail], [e-mail], [e-mail], [e-mail], [e-mail], [e-mail], [e-mail], [e-mail], [e-mail], [e-mail], [e-mail], [e-mail]
date		Wed, Nov 5, 2008 at 8:12 PM
subject		Staða formanns VR.

 

 

Þessi póstur er sendur á alla stjórnarmenn í VR (skv. vefsíðu félagsins).

Ég undirritaður mótmæli hér með harðlega að Gunnar Páll Pálsson sitji áfram sem formaður VR og skora ég hér með á stjórn VR að óska eftir því við hann að hann segi af sér, en víki honum ella.

Jafnframt fer ég þess á leit við stjórn VR að beita sér fyrir því að fulltrúar Lífeyrissjóðs VR sitji ekki í stjórnun félaga.

Með virðingu og ósk um réttlæti.
Viggó H. Viggósson

Ekki hægt að taka aðra ákvörðun

Fátt er svo með öllu illt ...

... að ei boði nokkuð gott!

Nú er þörf á fleiri góðum fréttum, fréttum til þess að fylgja þessari eftir. Besti væri að það væru fréttir í kjölfarið af skynsömum og djörfum ákvörðunum stjórnvalda og ráðamanna.

Mér dettur í hug fréttir af aðgerðum sem styðja við fjölskyldur í landinu sem nú eru að verða fyrir gríðarlegum áföllum vegna gengishruns og óðaverðbólgu. Fréttir af stuðningi við smærri fyrirtæki í landinu, af stuðningi við nýsköpun. Fréttir af því að þeir stjórnendur bankana sem hafa fortíð í sukkinu verði láttir víkja, að bankastjórn seðlabankans ákveði að víkja, að fengnir verði erlendir sérfræðingar til þess að hefja leiftur rannsókn á þeim hryðjuverkum sem unninn hafa verið gegn þjóðinni.

Það er svo margt sem brennur nú, sem brennur á, sem þolir enga bið.

Áfram veginn... í áttina að ljósinu.

Mesti afgangur á vöruskiptum frá því mælingar hófust